Lëtzebuergesch Bezeechnunge fir Buschtawen a Symboler am JAWS

Firwat ginn dës gebraucht?

Och wann RHVoice d'Nimm vun de Buschtawen a Symboler op Lëtzebuergesch kennt, benotzt JAWS seng eege Sproochdateien fir dës Zeechen ze benennen. D'Symboler ginn an der aktuell agestallter Windows-Sprooch ugesot – meeschtens Däitsch, Franséisch oder Englesch.

Mir stellen Dateien zur Verfügung, mat deenen d'Standarddateie vun JAWS ersat a mat lëtzebuergesche Bezeechnunge ergänzt kënne ginn.

Installatioun vun den Dateien

D'Dateie mussen an en Dossier op Ärem Computer kopéiert ginn, deen normalerweis verstoppt ass.

Jee nodeem wéi eng Versioun vu Windows Dir benotzt, fannt Dir dësen Dossier an der Systemsteierung, an den Optioune vum Datei-Explorer oder an den Dossieroptiounen. Wiesselt op den entspriechenden Onglet a aktivéiert d'Optioun, fir verstoppt Dateien, Dossieren a Lafwierker unzeweisen.

• Luet dësen ZIP-Archiv erof.
• Extrahéiert d'Elementer aus der Archivdatei. Doranner fannt Dir zwou Dateie mam Numm "sapi5x.sbl".
• Dir kënnt Sécherheetskopië vun de Standarddateien am Dossier C:\ProgramData\Freedom Scientific\JAWS\2025\SETTINGS uleeën.
• Kopéiert duerno déi erofgelueden Dateien an dësen Dossier an iwwerschreift déi bestoend Standarddateien.
• Beim Kopéieren kann eng Fënster erschéngen, an där Dir d’Administratorrechter bestätege musst. Bestätegt dës a fuert mam Kopéieren oder mam Ersetze vun den Dateie weider.
• Opgepasst: Wann Dir Är Versioun vun JAWS aktualiséiert, ginn dës Dateien erëm duerch d'Standardversioun ersat. An deem Fall musst Dir eis lëtzebuergesch Dateien op en neits kopéieren.

Nodeems Dir dës Dateien ersat hutt, musst Dir JAWS nei starten. Probéiert dann Text op Ärer Tastatur anzeginn, inklusiv Sazzeechen.

D'Symboler sollten elo mat der lëtzebuergescher RHVoice-Stëmm op Lëtzebuergesch ugesot ginn.